Hann Andri Þór virðist ekki alveg skilja afleiðingar gjörða sinna, eða þá að hann haldi að allir veggir, húsgögn og hurðir séu eins og tússtöflur.  Hann var búinn að tússa með svörtum túss á hurðina að herberginu þeirra, á parketið, á rúmið sitt og á nokkur leikföng í morgun - við náðum af parketinu, en ekki af hurðinni, rúminu og dótinu hans.  Þetta var CD túss, ekki túss sem fer af með vatni eins og notað er á tússtöflur.  Hann er vanur tússtöflu í leikskólanum.  Að gefnu tilefni, erum við búin að fela alla tússliti, blýanta og aðra liti!  Hvatvísin í öllu sínu veldi - að framkvæma áður en að hugsa.

Börnin fóru í klippingu á föstudaginn, enda löngu kominn tími til.  Þau voru eins og englar.  Andri Þór var kominn með góðann lubba.  Ég vildi óska að þau gætu skipt um hárgerð - Andri Þór fékk sömu hárgerð og pabbi sinni - ekta hár til að dúllast með, þykkt og liðað.  Jóhanna Arna erfði mína hárgerð, fíngert hár - hryllingur að setja teygju í þetta hár!  Hún leyfir mér það einstaka sinnum.

Ég þarf að versla nýtt skjákort í vikunni.  Ég slökkti á tölvunni minni á föstudagskvöldið, allt í lagi með allt (að ég hélt).  Þegar ég startaði henni á laugardagsmorgun, fékk ég bara á skjáinn "check cable".  Keypti nýjan kapal, gekk ekki.  Þá var það annað hvort skjárinn eða skjákortið.  Fékk mömmu í heimsókn í morgun með sinn skjá, tengdi hann og fékk "no signal" á skjáinn.  Þar með var ég búin að útiloka kapalinn og skjáinn, þannig að það er skjákortið.  Skjákortið er aðeins ódýrari en skjár.

Jóhönnu gengur ágætlega að hætta með bleyju - samt nokkuð um slys í dag.  En  við ætlum að byrja með umbunarkerfi fyrir hana - límmiði í hvert skipti sem hún pissar og kúkar í klósettið.  Sá þessa fínu Latabæjar og Dóru límmiða úti í Bónus.